अमेरिका–दक्षिण कोरियाको सैन्य अभ्यासअघि उत्तर कोरियाले किन गर्‍यो क्षेप्यास्त्र प्रक्षेपण ?

काठमाडौं । उत्तर कोरियाले अमेरिका र दक्षिण कोरियाबीच हुन लागेको वार्षिक संयुक्त सैन्य अभ्यास ‘उल्ची फ्रिडम शिल्ड’ (Ulchi Freedom Shield) सुरु हुन केही दिनअघि आफ्नो पूर्वी समुद्री क्षेत्रमा एक ब्यालिस्टिक क्षेप्यास्त्र प्रक्षेपण गरेको छ । प्योङयाङले विगतदेखि नै यस्ता संयुक्त सैन्य अभ्यासलाई ‘आक्रमणको पूर्वाभ्यास’ भन्दै विरोध गर्दै आएको छ ।

यो प्रक्षेपण एक साताभित्र उत्तर कोरियाले गरेको दोस्रो क्षेप्यास्त्र परीक्षण हो । पछिल्लो समय रूससँग बढ्दो सैन्य सहकार्य र उत्तर कोरियाको विस्तार हुँदै गएको हतियार कार्यक्रमलाई लिएर क्षेत्रीय तनाव चुलिएको अवस्थामा यो घटना भएको हो ।