१ हजार ८७० सिलिन्डर ग्यास आउँदा आधा उपभोक्ता रित्तै

गाईघाटमा बुधबार १ हजार ८७० सिलिन्डर कोशी ग्यास आए पनि मागअनुसार आपूर्ति नहुँदा घण्टौँ लाइन बसेका आधाभन्दा बढी उपभोक्ता रित्तै फर्किएका छन्। बिहान २ बजेदेखि सिलिन्डर बोकेर लाइनमा बसेका उपभोक्ताले समेत दिउँसो ४ बजेसम्म कुर्नुपरेको थियो।

बुधबार कोशी ग्यास आउने जानकारी पाएपछि सदरमुकाम गाईघाटका उपभोक्ता बिहान २ बजेदेखि नै सिलिन्डर लिएर लाइनमा बसेका थिए। बिहान ६ बजेसम्म लाइनमा बस्नेको संख्या ७ देखि ८ सय पुगिसकेको थियो। गाईघाटको पिपलचोकस्थित अधिकृत बिक्रेता रमाइलो पल सप्लायर्स र संगमचोकस्थित सयपत्री सप्लायर्समा उपभोक्ताले भोक, निद्रा र तिर्खा त्यागेर घण्टौँ लाइन बसेका थिए।