ब्राउन सुगरसहित भारतीय पक्राउ, खरिद गर्न आएकाबाट चार लाख ७१ हजार बरामद

विराटनगर : विराटनगरबाट प्रहरीले ठूलो परिमाणको लागुऔषध ब्राउन सुगर (खैरो हेरोइन) सहित भारतीय नागरिकलाई पक्राउ गरेको छ । उक्त लागुऔषध खरिद गर्न आएका युवक पनि चार लाख ७१ हजार रूपैयाँसहित पक्राउ परेका छन् । भारतबाट लागुऔषध बोकेर नेपाल प्रवेश गर्दै गरेका भारतीय नागरिक र उक्त लागुऔषध खरिद गर्न विराटनगर आएका जुम्लाका एक युवक पक्राउ परेका हुन् । पक्राउ परेका नेपाली युवकको साथबाट ४ लाख ७१ हजार रुपैयाँ नगदसमेत बरामद भएको प्रहरीले जनाएको छ ।

आइतबार बिहान करिब १०ः४० बजे विराटनगर महानगरपालिका–१५ स्थित रानीको २ नम्बर ढाटमा इलाका प्रहरी कार्यालय रानीबाट खटिएको टोलीले भारतबाट पैदल नेपाल प्रवेश गर्दै गरेका एक व्यक्तिमाथि शंका लागेपछि चेकजाँच गरेको थियो । सो क्रममा उनले बोकेको कालो प्लास्टिकको झोलाभित्र रहेका दुईवटा टिफिन बट्टामा लुकाएर ल्याइएको ठूलो परिमाणको खैरो हेरोइन फेला परेको प्रहरीले जनाएको छ ।