पाँच वर्षदेखि अलपत्र दोमुख पुलबारे मन्त्री र सचिवलाई युवाहरूको ध्यानाकर्षण

मुगु र हुम्ला जिल्लालाई जोड्ने कर्णाली नदीमाथिको बहुप्रतीक्षित दोमुख मोटरेबल पुल निर्माण कार्य पाँच वर्षदेखि अलपत्र परेपछि 'भ्रष्टाचारविरुद्ध जरा अभियान'का युवाहरूले कर्णाली प्रदेश सरकारका भौतिक पूर्वाधार तथा शहरी विकासमन्त्री तथा मन्त्रालयका सचिवलाई ध्यानाकर्षण पत्र बुझाएका छन् ।

अभियानका संयोजक आशिष देवकोटाको नेतृत्वमा बुझाइएको पत्रमा पाँच वर्षसम्म पनि निर्माण कार्य सम्पन्न हुन नसकेको, पटक-पटक म्याद थप्दा समेत अपेक्षित प्रगति नदेखिएको तथा स्थानीय नागरिकले निरन्तर सास्ती भोग्नुपरेको विषय उठाउँदै तत्काल कानुनी कारबाही, स्पष्ट कार्ययोजना र अधिकतम एक वर्षभित्र पुल निर्माण सम्पन्न गर्ने लिखित प्रतिबद्धता माग गरिएको छ ।