कैदीबन्दीद्वारा आन्दोलन फिर्ता, दोषी उपर कारबाही गर्ने कपिलवस्तु प्रशासनको प्रतिबद्धता

कपिलवस्तु कारागारको बी ब्लकमा नाइके समूहले आफूमाथि ज्यादती गरेको भन्दै आन्दोलनरत कैदीबन्दीहरूले २४ घण्टापछि आन्दोलन रोकेका छन्। ब्लक २ को गेटमा ताला लगाएर सोमबार दिउँसो २ बजेदेखि कैदीहरूले कारागारको ब्लक २ नै नियन्त्रणमा लिएर आन्दोलनमा उत्रिएका उनीहरूले मागका विषयमा जिल्ला सुरक्षा समितिले छानबिन समिति बनाएर घटनाका दोषीलाई कारबाही गर्ने प्रतिबद्धता जनाएपछि मंगलबार करिब २ बजेतिर आन्दोलन रोकेका हुन्।

घटनाका विषयमा सहायक प्रजिअ भेषराज घिमिरेको नेतृत्वमा प्रजिअ जनार्दन गौतमले ३ सदस्यीय छानबिन समिति निर्माण गरेका थिए। सो लगत्तै दिउँसो प्रजिअ गौतम, सहायक प्रजिअ घिमिरे र पत्रकार महासंघका जिल्ला अध्यक्ष दिलाराम भुसाल कारागार पुगेर आन्दोलनरत कैदीबन्दीसँग दोषीलाई कारबाही गर्ने प्रतिबद्धता जनाएका थिए। सो प्रतिबद्धतापछि कैदीबन्दीहरूले ब्लक २ को ढोका खोलेका थिए।