नेपाल-बिहार गाँजा तस्करीको अन्तर्कथा

१९ असोज २०८२ को राति सुनसरीको कोसी गाउँपालिका-७ मा प्रहरीले धान खेतबाट ५३७ किलो १४० ग्राम गाँजा बरामद गर्‍यो। भारतसँग सीमा जोडिएको भन्टाबारीनजिकै खेतमा भण्डारण गरिएको गाँजा सीमापार तस्करी गर्ने तयारीको सूचना पाएपछि प्रहरी पुगेको थियो। त्यस क्रममा स्थानीय ४५ वर्षीय दिनेश यादव पक्राउ परे। बरामद गाँजाको परिमाणले सामान्य कारोबार नभई यसमा संगठित समूह रहेको संकेत दिन्थ्यो।

यसको सात महिनापछि गत २९ वैशाखमा गाँजा तस्करीको अर्को चकित पार्ने घटना धरानमा सार्वजनिक भयो। यसपटक गाँजा एम्बुलेन्समा फेला पर्‍यो। धरान उपमहानगरपालिका-१३ मा प्रहरीले को १ च ७३५९ नम्बरको एम्बुलेन्सबाट ४४० किलोग्राम गाँजा बरामद गर्‍यो। एम्बुलेन्स बुढासुब्बा डायग्नोस्टिक सेन्टर प्रालि धरानले सञ्चालन गर्थ्यो।