कृषि बिमामा सवा दुई अर्ब खर्चिने

सरकारले किसानको जोखिम न्यूनीकरण गर्न आगामी वर्ष करिब सवा दुई अर्ब रुपैयाँ खर्चिने भएको छ। जलवायु परिवर्तन, प्राकृतिक विपत्ति, रोगव्याधि र बजार जोखिमका कारण कृषि क्षेत्र झन् असुरक्षित बन्दै गएको बेला सरकारले कृषि बिमामार्फत केही राहत दिन लागेको हो।

सरकारले कृषि तथा पशुपन्छी बिमालाई प्राथमिकता दिँदै आगामी आर्थिक वर्ष २०८३/८४ का लागि दुई अर्ब १९ करोड रुपैयाँ बजेट विनियोजन गरेको छ। विगत १२ वर्षमा सरकारले बाली तथा पशुपन्छी बिमामार्फत किसानलाई करिब ११ अर्ब रुपैयाँभन्दा बढी अनुदान गराइ सकेको छ।