रसुवाका बाढीपीडितका लागि जुम्लामा पनि जुट्यो आर्थिक सहयोग

रसुवा जिल्लामा भदौ १० गते आएको बाढीबाट प्रभावित नागरिकको राहत, उद्धार तथा पुनर्स्थापनाका लागि जुम्लाबाट आर्थिक सहयोग गरिएको छ।

जुम्ला उद्योग वाणिज्य संघले प्रधानमन्त्री दैवी प्रकोप उद्धार कोषमा एक लाख एक हजार रुपैयाँ जम्मा गरेको छ। संघका अध्यक्ष दिलबहादुर रोकायाका अनुसार रसुवामा भएको जनधनको क्षति र भौतिक संरचनाको पुनर्निर्माणमा सहयोग पुगोस् भन्ने उद्देश्यले रकम प्रदान गरिएको हो। बाढीबाट रसुवामा सडक, पुल, घरलगायत विभिन्न भौतिक संरचनामा क्षति पुगेको भन्दै संघले विपद्पीडितको पुनर्स्थापनामा राज्यको प्रयासलाई सहयोग गर्ने उद्देश्यले रकम उपलब्ध गराएको जनाएको छ।