रसुवा बाढी प्रभावित यातायात श्रमिकको उद्धार र पुनःस्थापनामा आईटीएफको चासो

काठमाडौं- अन्तर्राष्ट्रिय यातायात मजदुर महासंघ (आईटीएफ) ले रसुवा बाढीबाट प्रभावित यातायात श्रमिकको खोजी, उद्धार, राहत तथा पुनःस्थापनाका लागि नेपालका यातायात मजदुर संगठन र सरकारसँग समन्वय गरी काम गर्ने जनाएको छ।

आईटीएफमा आबद्ध नेपाल यातायात स्वतन्त्र मजदुर संगठन, युनिट्राभ र नेपाल यातायात मजदुर संघका प्रतिनिधिसँग भएको भर्चुअल बैठकमा आईटीएफ वर्ल्ड कमिटीका उपाध्यक्ष स्कट म्याक्डनिले बाढी प्रभावित श्रमिकको अवस्था पहिचान, खोजी तथा उद्धारका साथै राहतका लागि आवश्यक सहयोग र समन्वय गर्ने प्रतिबद्धता जनाएका हुन्।