नेपालमा २०७० हिमताल, नियमित निगरानी कमजोर

रसुवाको भोटेकोसी–त्रिशूली क्षेत्रमा आएको विनाशकारी बाढीले हिमाली क्षेत्रमा तीव्र गतिमा भइरहेको परिवर्तन र त्यसको निगरानीमा हाल रहेका ठुला कमजोरीलाई फेरि सतहमा ल्याएको छ। हिमपहिरो, हिमताल, हिमनदी र उच्च हिमाली भूभागमा हुने आकस्मिक परिवर्तनको समयमै जानकारी नहुँदा तल्लो तटीय क्षेत्रमा बसोवास गर्ने समुदायदेखि सडक, पुल र जलविद्युत् आयोजनासम्म जोखिममा रहेको विज्ञहरू बताउँछन्।

हिमालय क्षेत्रमा बढ्दो तापक्रमसँगै हिमनदी पग्लिने र खुम्चिने क्रम तीव्र छ। त्यसबाट एकातिर नयाँ हिमताल बनिरहेका छन् भने अर्कातर्फ पुराना हिमतालको आकार बढिरहेको छ। इन्टरनेसनल सेन्टर फर इन्टिग्रेटेड माउन्टेन डेभलपमेन्ट (इसिमोड) को पछिल्लो अध्ययनले हिन्दुकुश हिमालय (एचकेएच) क्षेत्रमा रहेका झन्डै ६३ हजार ७ सय हिमनदीमध्ये अहिलेसम्म ३८ वटामा मात्र प्रत्यक्ष दीर्घकालीन मापन गरिएको देखाएको छ।