टरिगाउँ विमानस्थललाई हालसम्मकै ठूलो बजेट विनियोजन

तुलसीपुर (दाङ) । दाङको तुलसीपुरस्थित ऐतिहासिक टरिगाउँ विमानस्थलको स्तरवृद्धिका लागि संघीय सरकारले आर्थिक वर्ष २०८३÷८४ मा २५ करोड रुपैयाँ बजेट विनियोजन गरेको छ । संस्कृति, पर्यटन तथा नागरिक उड्डयन मन्त्रालयले सार्वजनिक गरेको वार्षिक विकास कार्यक्रमअनुसार विमानस्थलको १ हजार ५ सय मिटर धावनमार्ग विस्तार तथा पूर्वाधार सुधारका लागि सो रकम छुट्याइएको हो ।

टरिगाउँ विमानस्थलका लागि एकैपटक यति ठूलो बजेट विनियोजन भएको यो पहिलोपटक हो । वर्षौंदेखि बजेट भाषणमा विमानस्थल विस्तारको चर्चा हुने गरे पनि पर्याप्त रकम अभावका कारण योजना कार्यान्वयनमा जान सकेको थिएन । यसपटक भने बजेट सुनिश्चित भएसँगै दाङवासीमा नयाँ आशा जागेको छ ।