बाढीले बगर बनायो देवीघाट बजार

तत्कालीन श्री ५ पृथ्वीनाराण शाहले बाइसी/चौबिसी राज्य एकीकरण गरेपछि विश्राम लिएको उनको समाधिस्थल देवीघाट नुवाकोटको मात्र नभएर मुलुककै ऐतिहासिक एवं धार्मिक पर्यटकीय गन्तव्यस्थल हो। बाढीले बगर बनाउनुअघि यस क्षेत्रमा दैनिक १५ सयदेखि २ हजारको संख्यामा आन्तरिक तथा बाह्य पर्यटक पुग्ने गर्दथे। स्थानीयका घर कुनै सग्ला छैनन्। बाँकी रहेका घर पनि पूरै हिलो र बालुवाले भरिएको छ। घरभित्रका धनसम्पत्ति पनि बचेको छैन।

बाढी आउनुअघि दैनिक व्यापारिक चहलपहलले भरिने देवीघाट बजार अहिले मसानघाट झैं सुनसान छ। भदौ १० गते आएको भोटेकोसी बाढीले देवीघाट बजार तहसनहस बनाएपछि पुरानो रौनक सकिएको छ। सडक, पसल, घर तथा आसपासका भौतिक संरचनासहित देवीघाट बजारका पाँच सय घर बगाएर बगरमा परिणत भएको छ। केही क्षतविक्षत् घरहरूमा पनि पूरै हिलो र पांगो तथा बालुवा-ढुंगाको थुप्रो लागेको छ। सुनामी झैं अतिवेगका साथ आएको बाढीले देवीघाट बजारको तीनतले ढलान घरभित्र च्यापिएको अवस्थामा रहेको नीरज भण्डारीको शव तीन दिनपछि निकालिएको थियो।