निजी क्षेत्रबिना आर्थिक रूपान्तरण असम्भव, राज्य एक्लैले स्रोत जुटाउन सक्दैन : पूर्वअर्थमन्त्री पाण्डे

काठमाडौँ। पूर्वअर्थमन्त्री सुरेन्द्र पाण्डेले राज्य एक्लैले देशको विकासका लागि आवश्यक पर्ने सबै स्रोत परिचालन गर्न नसक्ने बताएका छन्। निजी क्षेत्रको सक्रिय र अर्थपूर्ण सहभागिताबिना मुलुकको आर्थिक रूपान्तरण सम्भव नहुने उनको ठहर छ।

राजधानीमा आयोजित आगामी आर्थिक वर्ष २०८३/८४ को बजेटसम्बन्धी विशेष छलफल कार्यक्रममा बोल्दै पूर्वअर्थमन्त्री पाण्डेले देश निर्माणको प्रक्रियामा राज्य सधैँ नेतृत्वदायी भूमिकामा रहने भए पनि विकासको सम्पूर्ण जिम्मेवारी सरकारले मात्र वहन गर्न नसक्ने स्पष्ट पारे। उनले देश निर्माणमा सरकार र निजी क्षेत्रको भूमिका कस्तो हुने भन्ने विषयमा अझै पनि नीतिगत स्पष्टता आवश्यक रहेको औँल्याए। अबका दिनमा सरकार र निजी क्षेत्रबीचको कार्यक्षेत्र र भूमिकाबारे राज्यले स्पष्ट दृष्टिकोण अघि सार्नुपर्नेमा उनले जोड दिए।