वैधानिकता नपाएको इतर पक्षको भेलाले निम्त्याएको संकटमा कांग्रेस

काठमाडौं -नेपाली कांग्रेसको शेरबहादुर देउवा पक्षधरको राष्ट्रिय भेलाले १४औँ महाधिवेशनबाट निर्वाचित कार्यसमितिलाई नै निरन्तरता दिँदै १५औँ महाधिवेशनको तयारीको जिम्मेवारी पूर्वमहामन्त्री डा. शशांक कोइरालालाई सुम्पने निर्णय गरेको छ। विशेष महाधिवेशनमार्फत गगनकुमार थापाको नेतृत्व चयन भइसकेको र निर्वाचन आयोगबाट समेत त्यसले आधिकारिकता पाइसकेको अवस्थामा देउवा पक्षले यो कदम चाल्नुले कांग्रेसको आन्तरिक राजनीतिलाई थप गम्भीर द्वन्द्वतर्फ धकेलेको छ।

​ एकातिर निर्वाचन आयोगको आधिकारिकता प्राप्त गगन थापा नेतृत्वको केन्द्रीय समिति क्रियाशील छ भने अर्कोतर्फ इतर पक्षले समानान्तर रूपमा छुट्टै महाधिवेशनको तयारी थाल्नुले पार्टीभित्रको वैधानिक र पदीय मान्यताको विवाद अझ गहिरिने देखिन्छ।