छोराको पत्थरीको शल्यक्रिया सहयोग जुटाउन टिकटक भिडिओ राख्दा पनि स्क्याम, उल्टै गुम्यो ३८ लाख

काठमाडौं । मानवीय संवेदनाको फाइदा उठाएर सोझा नागरिकलाई नै ठग्ने प्रवृत्ति अनलाइनमा समेत मौलाउन थालेको छ । छोराको मृगौलामा रहेको पत्थरीको शल्यक्रियाका लागि खर्च जुटाउन नसकेर सामाजिक सञ्जाल टिकटकमा गुहार मागेकी एक महिला आफैँ ठगको जालमा परेर ३८ लाख २८ हजार रुपैयाँ गुमाउन पुगेकी हुन् ।

गएको विहीबार कास्की जिल्ला अदालतमा एउटा अभियोगपत्र दर्ता भएसँगै यो घटना बाहिरिएको हो । कास्की जिल्ला साविक सिलदुजुरे गाविस घर भई हाल पोखरा बस्ने ३९ वर्षीया सरिता थापा (नाम परिवर्तन) ले आफ्ना बिरामी छोराको उपचारमा सहयोगको अपिल गर्दै टिकटकमा भिडिओ सार्वजनिक गरेकी थिइन् । सोही भिडिओका आधारमा उनलाई @princesssultana804 नामक टिकटक ह्यान्डलबाट सम्पर्क गरी सहयोग गर्ने आश्वासन दिइएको थियो ।