जुम्लाका ३६८ भेडापालक किसानलाई 'गोठालो भत्ता'

जुम्लाको सिंजा–६ की भेडा पालक किसान हैतुना रावतले १८ हजार रुपैयाँ गोठालो भत्ता पाइन्। एक सयभन्दा बढी भेडा पालेकी उनी गोठालो भत्ता पाएपछि व्यवसायमा अझै हौसिएकी छिन्। 'गोठालो भत्ताबापत पाउने रकमले भेडामा देखिने रोगको उपचार खर्चदेखि अन्य काममा सहयोग पुगेको छ,' उनले भनिन्।

यस्तै ८० वटा भेडा पालेकी सिंजा–६ कै बसम रावत संकटमा पर्न थालेको व्यवसायलाई सरकारले आर्थिक सहयोग दिन थालेकाले खुसी लागेको बताउँछिन्। 'सरकारी कर्मचारीले मात्र तलबभत्ता पाउँछन् भन्ने थाहा पाएकी थिएँ, भेडा पाल्दा पनि भत्ता पाइँदो रहेछ,' उनले भनिन्। उनका अनुसार गोठालो भत्ताले किसानलाई निकै राहत दिएको छ।