देउवाको ‘हिन्दु कार्ड’ भारतीय राजनीतिमा राहुल गान्धीको ‘जनै प्रदर्शन’ जस्तै हो

नेपाली कांग्रेस असन्तुष्टपक्षको राष्ट्रिय भेलामा पूर्वप्रधानमन्त्री तथा समूहघोषित पार्टी सभापति शेरबहादुर देउवाले स्वर सकेसम्म चर्को पार्न खोज्दै भने– ‘म हिन्दु हुँ, म हिन्दु हुँ, म हिन्दु हुँ । मेरो ब्रतबन्ध, बिहे हिन्दु विधिअनुसार भएको हो । मलाई हिन्दु होइन भन्न पाइँदैन ।’

झट्ट सुन्दा अनौठो लाग्ने यो अभिव्यक्तिको पछाडि अवश्य राजनीतिक रहस्य छ । तर, तासको महलजस्तो कमजोर र टिठ लाग्दो । अनौठो यस अर्थमा कि एक हिन्दुले ‘म हिन्दु हुँ’ भनेर दाबी किन गरिरहनुपर्ने ? त्यो त स्वयंसिद्ध तथ्यजस्तै हो । आजसम्म सायद देशको इतिहासमा कसैले राजनीतिक मञ्चबाट यस्तो धार्मिक घोषणा गरेको थिएन/ छैन । देउवाले यसो भन्नुपर्ने स्थिति कहाँबाट किन आयो ? उनलाई कसले हिन्दु होइन भन्यो ? ‘देउवाजी हिन्दु होइनन्’ भनेर कसैको सार्वजनिक अभिव्यक्ति सुनिएको छैन ।