ग्यासको आपूर्ति सहज बन्दै, अनावश्यक सिलिण्डर सञ्चय नगर्न निगमको आग्रह

काठमाडौं– नेपाल आयल निगमले बजारमा खाना पकाउने ग्यासको आपूर्ति सहज बन्दै गएको जनाएको छ। निगमले मागभन्दा बढी ग्यास बजारमा पठाइरहेको भन्दै उपभोक्तालाई अनावश्यक रूपमा सिलिण्डर सञ्चय नगर्न आग्रह गरेको छ । निगमका अनुसार काठमाडौँ उपत्यकामा दैनिक औसत ३५ हजारदेखि ३७ हजार सिलिण्डर ग्यासको माग हुने गरेकोमा अहिले दैनिक पाँच हजारदेखि आठ हजार सिलिण्डर बढी आपूर्ति भइरहेको छ ।

निगमका निर्देशक विनितमणि उपाध्यायका अनुसार आपूर्ति यही रूपमा जारी रहे केही दिनमै बजारमा ग्यासको अवस्था सामान्य हुनेछ। भदौ २ गते मात्रै काठमाडौँ उपत्यकाका २२ वटा ग्यास उद्योगले ४७ हजार ३८८ सिलिण्डर बिक्री गर्दैछन्। यसअघि भदौ १ गते ५२ हजार ५७६ सिलिण्डर बिक्री भएको थियो। यो उपत्यकाको दैनिक औसत मागभन्दा करिब १५ हजार सिलिण्डर बढी हो । निगमका अनुसार साउन २७ गतेदेखि भदौ २ गते साँझसम्म काठमाडौँ उपत्यकामा ३ लाख ९ हजार ५५३ सिलिण्डर बिक्री भइसकेका छन्। यस अवधिमा दैनिक औसत ४४ हजारभन्दा बढी सिलिण्डर बिक्री भएको निगमले जनाएको छ ।