सईसँगको भिडिओ भाइरल भएपछि युवतीले दिइन् वैयक्तिक गोपनीयता हननको जाहेरी, ५ सदस्यीय समिति गठन

काठमाडौँ । काभ्रेपलाञ्चोकको भकुण्डेवेशीस्थित प्रहरी चौकीका इन्चार्ज, प्रहरी नायब निरीक्षक (सई) गणेशकुमार श्रेष्ठ र एक युवतीको भिडिओ भाइरल भएको घटनामा फौजदारी कसुरअन्तर्गत जाहेरी दर्ता भएको छ । भिडिओ सार्वजनिक भएपछि आफ्नो वैयक्तिक गोपनीयतामा गम्भीर आँच पुगेको भन्दै पीडित युवतीले सोमबार जिल्ला प्रहरी कार्यालय काभ्रेमा जाहेरी दिएकी हुन् ।

जाहेरी परेसँगै प्रहरीले अनधिकृत रूपमा भिडिओ खिच्ने र त्यसलाई सामाजिक सञ्जालमा फैलाउनेहरूमाथि कानुनी कारबाहीको प्रक्रिया सुरु गरेको छ । जिल्ला प्रहरी कार्यालय काभ्रेका प्रवक्ता एवं प्रहरी नायब उपरीक्षक (डीएसपी) रविन विष्टले युवतीको जाहेरीका आधारमा फौजदारी कसुरअन्तर्गत अनुसन्धान थालिएको जानकारी दिए ।