संस्थापनइतरले गरेको भेलामा कांग्रेसका जिल्ला सभापति र क्षेत्रीय सभापति को को सहभागी भए ?

३ भदौ, काठमाडौं । नेपाली कांग्रेसको संस्थापनइतरले गरेको राष्ट्रिय भेलामा १० जिल्लाका सभापति सहभागी भएका छन् । साउन २९ देखि ३१ गतेसम्म काठमाडौंमा भएको भेला/सम्मेलनमा सबैभन्दा बढी सुदूरपश्चिमबाट जिल्ला सभापतिहरु सहभागी भएका छन् । कोशी, मधेश र लुम्बिनीका जिल्लाबाट कुनै पनि सभापति भेलामा सहभागी भएनन् । बागमती र कर्णालीका जिल्लाबाट एक/एक जना सभापति उपस्थित भएका थिए ।

बागमतीमा भक्तपुरका जिल्ला सभापति दुर्लभ थापा मात्रै सहभागी भए । कर्णालीबाट मुगुका जिल्ला सभापति ऐनबहादुर शाही मात्रै सहभागी थिए। गण्डकीका जिल्लाहरुमा स्याङ्जाका राजु थापा, बागलुङका जित शेरचन र म्याग्दी खमवीर गर्बुजा संस्थापनइतरको भेलामा उपस्थित थिए ।