जिउधनको सुरक्षा र माटोको रक्षाका लागि सुस्ताबासीको क्रन्दन

काठमाडौं । नेपालको २६ वटा जिल्ला भारतीय सीमासँग जोडिएको छ । ती मध्ये ८१ स्थानमा भारतीय अतिक्रमण भएको सीमाविद्हरुले बताउँदै आएका छन् । ती मध्ये सबैभन्दा बढी नवलपरासीको सुस्ता भारतीय अतिक्रमणको चपेटामा छ । ‘सुस्ता बचाउ अभियान’ नै गठन गरि वर्षौदेखि भारतीयसँग जुध्दै आएका सुस्ताबासी केन्द्र सरकारलाई आफ्नो आवाज सुनाउन काठमाडौं आएका छन् ।

भारतीय अतिक्रमणको चपेटामा परेको सुस्ता बचाउन भन्दै सुस्ताबासीहरु वर्षौदेखि संघर्ष गर्दै आएका छन् । सुस्तालाई बचाउन भन्दै उनीहरुले ‘सुस्ता बचाउ अभियान’ नै सञ्चालन गरे । अभियानको सञ्चालन गोपाल गुरुङले गर्दै आएका थिए । वर्षौदेखि आफ्नो भूमि रक्षाको लागि संघर्ष गर्दै आएको यो अभियानले ८ वर्षअघि काठमाडौं आएर केन्द्र सरकारलाई अवगत गराएको थियो । गुरुङकै नेतृत्वमा आएको टोलीले हप्तौं सम्म काठमाडौंमा धर्ना दिएको थियो ।