प्रिय 'मनु' दाइ, तपाईंलाई बिर्सौं कसरी?

म भर्खरै प्यूठानबाट स्नातक अध्ययन गर्न भैरहवा झरेको थिएँ। भैरहवाबाट प्रकाशित हुने लुम्बिनीखबर साप्ताहिक पत्रिकामा २०६८ को मंसिरदेखि टाइपिष्टको रूपमा काम सुरु गरेँ। मलाई राम्रोसँग याद छ– २०६८ को पुसको जाडो महिनामा पत्रकार मनोरञ्जन शर्मा दाइसँग भेट भयो।

लुम्बिनीखबरमा भएको हाम्रो पहिलो भेटमै दाइसँग परिचय गर्यौं, लगत्तै दाइले ‘हिँड् प्यूठानी कान्छा, म तिमीलाई मःम खुवाउँछु’ भन्नुभयो। त्यतिबेला भैरहवा–बुटवलको व्यापारिक मार्ग बनेको थिएन। आवारोडको चोकमा रहेको मःम पसलमा गएर दुई भाइले मःम खायौं।