बेड अभावले एम्बुलेन्समै मृत्यु स्वास्थ्य सेवामाथि गम्भीर प्रश्न

त्रिभुवन शिक्षण अस्पताल, महाराजगन्जको आकस्मिक कक्षबाहिर गत साता एम्बुलेन्समै एक बिरामीको मृत्यु भएको घटनाले नेपालको सरकारी स्वास्थ्य सेवाको वास्तविक अवस्थामाथि गम्भीर प्रश्न उठाएको छ । मोरङका ४५ वर्षीय डोलबहादुर थापा नियमित डायलासिस गराइरहेका बिरामी थिए । स्ट्रोकको समस्या देखिएपछि उपचारका लागि शिक्षण अस्पताल ल्याइएका उनको आकस्मिक कक्षबाहिरै मृत्यु भयो । अस्पतालका अनुसार आकस्मिक कक्षमा तत्काल बेड उपलब्ध थिएन ।

अस्पतालले बेड मिलाउने आश्वासन दिइरहेको थियो । तर आकस्मिक कक्षका समेत बेड नमिलेकाले आफन्तले भने बिरामीलाई अर्को अस्पताल लैजाने बताएका थिए । अस्पतालले बेड मिल्दै छ भनिरहँदा आकस्मिक कक्षबाहिर एम्बुलेन्समा तड्पिरहेका बिरामीको उपचार नै नपाई त्यहीँ मृत्य भयो । अस्पताल पुगिसकेका बिरामी उपचार नै नपाएर अस्पताल प्राङ्गणभित्रै एम्बुलेन्समा ज्यान गुमाउन बाध्य भए । यो गम्भीर र दुःखदायी घटनालाई लिएर छानबिनको माग उठिरहेको छ ।