शवका अंगको बिक्री प्रकरण :  हार्वर्ड मेडिकल स्कुलले ४७ पीडित परिवारलाई ५ करोड ३० लाख डलर क्षतिपूर्ति दिने

अमेरिका । अमेरिकाको प्रतिष्ठित हार्वर्ड मेडिकल स्कुलले पूर्व शवगृह व्यवस्थापकले दान गरिएका शवका अंग चोरी गरी बिक्री गरेको घटनाबाट प्रभावित ४७ परिवारलाई ५ करोड ३० लाख डलर क्षतिपूर्ति दिने सहमति गरेको छ। अदालतको स्वीकृतिपछि दुईवटा सामूहिक मुद्दा टुंग्याउन उक्त रकम वितरण गरिने भएको हो।

हार्वर्डका पूर्व शवगृह व्यवस्थापक सेड्रिक लजले सन् २०१८ देखि २०२३ सम्म चिकित्सा शिक्षा र अनुसन्धानका लागि दान गरिएका शवबाट मस्तिष्क, छाला, हात र अनुहारलगायत अंग निकालेर बिक्री गरेको अभियोगमा दोषी ठहरिएका थिए। उनले शव अन्तिम संस्कारका लागि पठाउनुअघि अंग निकाल्ने गरेको स्वीकार गरेका थिए।