व्यापार घाटा २५ प्रतिशतले वृद्धि हुँदा निर्यातमा उल्लेख्य सुधार‍

चालु आर्थिक वर्ष २०८३/८४ को पहिलो महिनामै नेपालको वैदेशिक व्यापारमा निर्याततर्फ उल्लेख्य सुधार देखिएको छ। निर्यातको वृद्धिदर उच्च भए पनि आयातको ठूलो आकारका कारण व्यापार घाटा भने झन् बढेको छ।

भन्सार विभागले शुक्रबार सार्वजनिक गरेको चालु आर्थिक वर्षको पहिलो महिनाको तथ्यांकअनुसार साउनमा नेपालको निर्यात ६१.७२ प्रतिशतले बढेको छ। यस अवधिमा नेपालले ३८ अर्ब ७० करोड रुपैयाँ बराबरका वस्तु निर्यात गरेको छ। गत आर्थिक वर्षको साउनमा यस्तो निर्यात २३ अर्ब ९३ करोड रुपैयाँ रहेको थियो। अर्थात् एक वर्षको अवधिमा निर्यात १४ अर्ब ७७ करोड रुपैयाँले बढेको हो।