चर्को घाममा न्याय पर्खिंदै मधेसका वित्तीय पीडित

भदौको चर्को घाम र दर्कंदो पानीमा खुला आकाशमुनि छाता र पालको सहारामा दिन-रात बिताउँदै आएका बैंक, लघुवित्त, सहकारी र मिटरब्याज पीडितहरू सरकारले न्याय नदिएसम्म घर नफर्कने अडानमा छन्।

ललितपुरको पुल्चोकस्थित राष्ट्रिय मानवअधिकार आयोगको कार्यालयअगाडि ६ दिनदेखि धर्नामा बस्दै आएका पीडितले यस्तो अडान लिएका हुन्। उनीहरूको एउटै आवाज छ, ‘हामी १९ दिनसम्म पैदल हिँडेर काठमाडौं आइपुग्यौं, अब माग पूरा नभएसम्म घर फर्कंदैनौं।’