मधेस सरकारले बाढी प्रभावित क्षेत्रमा १ करोड ९६ लाख बराबरको राहत सामग्री सहयोग गर्ने

जनकपुरधाम । मधेस प्रदेश सरकार मन्त्रिपरिषद्ले रसुवाको भोटेकोशी र त्रिशूलीमा आएको बाढीबाट प्रभावितहरूका लागि १ करोड ९६ लाख रुपैयाँ बराबरको आवश्यकता अनुसार टेन्ट र कम्बल वितरण गर्ने निर्णय गरेको छ । त्यस्तै, मधेस प्रदेशका नागरिक उक्त घटनामा परि मृत्यु भएका आफन्तलाई तत्काल राहत स्वरुप १ लाख प्रदान गरिने भएको छ ।

मुख्यमन्त्री तथा मन्त्रिपरिषद्को कार्यालयमा सोमबार मुख्यमन्त्री कृष्ण प्रसाद यादवको अध्यक्षतामा बसको मन्त्रिपरिषद्को बैठकले उक्त निर्णय गरेको हो । बैठकले भोटेकोशी तथा त्रिशूली नदी क्षेत्रमा आएको बाढी तथा त्यसबाट सिर्जित विपद्का कारण मृत्यु भएका मधेस प्रदेशका नागरिकका परिवार वा नजिकका हकवालालाइ प्रति मृतक रु. १ लाख का दरले राहत प्रदान गर्ने तथा घाइते भएमा प्रादेशिक अस्पतालहरूमा निःशुल्क उपचारको व्यवस्था गर्ने निर्णय भएको अर्थमन्त्री युवराज भट्टराईले बताए । उनका अनुसार हालसम्म मधेसबाट ४ जनाको मृत्यु भइसकेको र १ सय ६० जना सम्पर्कविहीन अवस्थामा छन् ।