दस महिनामा ४५ अर्बको लगानी प्रतिबद्धता,कुन क्षेत्रमा कति ?

चालु आर्थिक वर्ष २०८२/८३ को पहिलो १० महिनामा नेपालमा ४५ अर्ब रुपियाँभन्दा बढीको प्रत्यक्ष वैदेशिक लगानी (एफडीआई) प्रतिबद्धता आएको छ। उद्योग विभागका अनुसार साउनदेखि वैशाखसम्म ७२८ वटा परियोजनामार्फत कुल ४५ अर्ब ३२ करोड १६ लाख लगानी प्रतिबद्धता प्राप्त भएको हो।विभागको तथ्याङ्कअनुसार चैतसम्म ६१५ परियोजनामार्फत ४१ अर्ब ७९ करोड ८५ लाख लगानी प्रतिबद्धता आएको थियो भने वैशाख महिनामा मात्रै थप ११३ परियोजनाबाट तीन अर्ब ५२ करोड ३० लाख रुपियाँ बराबरको प्रतिबद्धता आएको छ।

१० महिनाको अवधिमा सबैभन्दा धेरै लगानी प्रतिबद्धता कृषिमूलक उद्योग क्षेत्रमा आएको देखिएको छ। यो क्षेत्रमा रहेका १६ परियोजनामा २२ अर्ब आठ करोड ८० लाख रुपियाँ लगानी प्रतिबद्धता प्राप्त भएको छ। त्यस्तै पर्यटन क्षेत्रका १८९ परियोजनामा १२ अर्ब ५४ करोड ७० लाख रुपियाँ लगानी प्रतिबद्धता आएको छ। सेवामूलक क्षेत्रका ५५ परियोजनाका लागि चार अर्ब २३ करोड २४ लाख रुपियाँ, उत्पादनमूलक ४२ परियोजनामा दुई अर्ब ७० करोड रुपियाँ तथा पूर्वाधारसम्बन्धी एक परियोजनामा एक अर्ब ६५ करोड रुपियाँ लगानी प्रतिबद्धता आएको विभागले जनाएको छ।