मान्ममा १४ घर पहिरोको जोखिममा, तीन घर बगे

कालीकोट सदरमुकाम मान्म बजारका १४ भन्दा बढी घर पहिरोको उच्च जोखिममा परेका छन्। तीन वटा घर पहिरोले बगाइसकेको छ भने बाँकी घरको मुनिबाट पहिरो बगिरहेको छ। कुनै पनि बेला ती घरसमेत ढल्ने जोखिम रहेको स्थानीयवासी बताउँछन्।

खाँडाचक्र नगरपालिकाले प्रशासकीय भवन निर्माणका लागि जग खन्दा निस्किएको पहिरो नियन्त्रण नगर्दा बजारको मुख्य सडकसँगै नागरिकका घरसमेत जोखिममा परेका हुन्। अति जोखिमयुक्त क्षेत्रमा नगरपालिकाले प्राविधिक प्रतिवेदनसमेत बेवास्ता गर्दै भवन निर्माण गर्न खोज्दा यस्तो विपद् निम्तिएको स्थानीयवासीको आरोप छ।