गरिमा हराएकी थिइन्, हामी कहाँ थियौँ ?

गरिमाको न्याय भनेको अपराधी पक्राउ पर्नु मात्र होइन, अपराधको सत्य बाहिर आउनु हो, निर्दाेष नफस्नु हो, दोषी उम्किन नपाउनु हो, प्रहरीको भूमिका छानबिन हुनु हो, परिवारले न्याय पाउनु हो र अर्की तीन वर्षीया बच्ची हराउँदा राज्यसँग आजभन्दा राम्रो उत्तर तयार हुनु हो ।

तीन वर्षीया गरिमा चौधरी गत साउन ३१ गते बिहान करिब साढे ८ बजे हराइन्, भदौ २ गते मृत भेटिइन् । बीचका ५७ घण्टा एउटा परिवारको पीडा मात्र होइन, राज्य संयन्त्र, प्रहरी र हाम्रो समाजको पनि परीक्षा थियो । हामी अपराधी खोजिरहेका छौँ । हामी अहिले गरिमाको हत्यारा खोजिरहेका छौँ । तर एउटा प्रश्न अझै बाँकी छ– गरिमा हराउँदा उनलाई खोज्ने राज्य कहाँ थियो ?