इरानी ह्याकरले बन्द गरिदिए बेलायतको विद्युत् केन्द्र

लन्डन । इरानसँग सम्बन्धित ह्याकरहरूले बेलायतको एउटा विद्युत् केन्द्र चार दिनसम्म सञ्चालन बन्द गराएको दाबी गरिएको छ। यो बेलायतको महत्वपूर्ण पूर्वाधारमाथि इरानी समूहले गरेको अहिलेसम्मकै गम्भीर साइबर हमलामध्ये एक हुन सक्ने भन्दै बेलायती सञ्चारमाध्यम द टेलिग्राफले समाचार छापेको छ।

साइबर आक्रमणपछि प्रभावित विद्युत् केन्द्र चार दिनसम्म बन्द रहेको थियो। कर्मचारीहरूले प्रणाली पुनः सञ्चालनमा ल्याउन काम गरेका थिए। गएको महिना इरानी ह्याकरहरूले अमेरिकाका जल पूर्वाधारमा शृङ्खलाबद्ध आक्रमण गरेको समयमा यो घटना भएको द टेलिग्राफको बुझाइ छ। यी आक्रमणमा १२ अमेरिकी राज्यका पूर्वाधार प्रभावित बनेका थिए। यी घटनाले ह्वाइट हाउससमेत चिन्तित भएको थियो।