२४ घण्टामा सवारी दुर्घटनामा ४ जनाको मृत्यु, १०६ जना घाइते

देशभर पछिल्लो २४ घण्टामा सवारी दुर्घटनामा चार जनाको मृत्यु भएको छ भने १०६ जना घाइते भएका छन्। प्रहरीका अनुसार गण्डकी प्रदेशमा दुई जना र बागमती प्रदेशमा दुई जनाको मृत्यु भएको हो। लुम्बिनीमा ३१, काठमाडौं उपत्यकामा २५, मधेशमा २२, कोशीमा १६ र गण्डकीमा एक जना घाइते भएका छन्।

दुर्घटनामा मृत्यु हुनेमध्ये कास्कीमा एक, नवलपरासी (पूर्व) मा एक तथा चितवनमा दुई जना रहेका छन्। कास्कीको पोखरा महानगरपालिका १६ लामागाउँमा शुक्रबार अपराह्न करिब ४ बजे मोटरसाइकल अनियन्त्रित भई सडकछेउको विद्युत् पोलमा ठोक्किएपछि विपरीत दिशाबाट आएको बसमा समेत ठोक्किएको थियो। दुर्घटनामा मोटरसाइकलमा पछाडि सवार २९ वर्षीया रुपा विक गम्भीर घाइते भएकी थिइन्। उनको उपचारका क्रममा चिकित्सकले मृत्यु घोषणा गरेका थिए।