बारामा हराएकी दुई वर्षीया बालिका रातभरको खोजीपछि सकुशल फेला

बाराको कलैयाबाट शनिबार साँझ हराएकी दुई वर्षीया बालिकालाई प्रहरीले रातभरको प्रयासपछि सकुशल फेला पारिएको छ।

कलैया उपमहानगरपालिका-१ कटि पर्सा टोल निवासी मुकेश कुमार मण्डलकी करिब दुई वर्षीया छोरी बिन्दी कुमारी मण्डल शनिबार साँझ साढे पाँच बजे आफ्नै घर अगाडिबाट हराएकी थिइन्। बालिकाका हजुरबुवा मदन मण्डलले राति पौने नौ बजे अस्थायी प्रहरी पोस्ट बसपार्कमा खबर गरेपछि प्रहरीले तत्काल खोजी कार्य सुरु गरेको थियो। खोजीका लागि विभिन्न समूहमा प्रहरी टोली परिचालन गर्नुका साथै कुकुरसहितको टोली पनि खटाइएको थियो।