रञ्जित आचार्य कान्स कर्पोरेट मिडिया एण्ड टिभी अवार्डको जुरीमा

प्रिज्मा एड्भर्टाइजिङका संस्थापक, प्रमुख कार्यकारी अधिकृत तथा क्रिएटिभ हेड रञ्जित आचार्य कान्स कर्पोरेट मिडिया एण्ड टिभी अवार्ड २०२६ को निर्णायक मण्डल सदस्यमा मनोनित भएका छन्। विश्वकै प्रतिष्ठित कर्पोरेट फिल्म तथा भिजुअल स्टोरीटेलिङ अवार्डमध्ये एक मानिने यस अवार्डको जुरीमा स्थान बनाउने उनी पहिलो नेपाली सिर्जनशील व्यक्तित्व बनेका छन्।

सन् २०१० मा स्थापना भएको कान्स कर्पोरेट मिडिया एण्ड टिभी अवार्डको मुख्यालय अष्ट्रियाको भियनामा रहेको छ। हरेक वर्ष फ्रान्सको कान्समा हुने महोत्सवले कर्पोरेट फिल्म, अनलाइन मिडिया, वृत्तचित्र र प्रतिवेदन निर्माणका क्षेत्रमा उत्कृष्ट कृतिलाई सम्मान गर्दै आएको छ। अवार्डमा प्रदान गरिने गोल्ड, सिल्भर, ब्ल्याक, ब्लु र ह्वाइट डल्फिन ट्रफीलाई कर्पोरेट फिल्म क्षेत्रको प्रतिष्ठित सम्मान मानिन्छ।