बागलुङ नगरमा उत्पादनसँग जोड्न ‘एक बोट, सयको नोट’ कार्यक्रम

बागलुङ नगरपालिकाले यहाँका खाली जमिनलाई उत्पादनमा लगाउन ‘एक बोट, सयको नोट’ कार्यक्रम ल्याएको छ। बागलुङ नगरपालिकाको आर्थिक वर्ष २०८३/८४ को नीति तथा कार्यक्रम बुधबार १९औँ नगरसभामा प्रस्तुत गर्दै नगरप्रमुख बसन्तकुमार श्रेष्ठले वातावरणको रक्षा गर्दै बाँझो जमिनलाई हराभरा बनाउन र किसानलाई सिधै उत्पादनसँग जोड्न आगामी आर्थिक वर्षमा वातावरणमैत्री नवप्रवर्तन नीतिका रूपमा ‘एक बोट, सयको नोट’ कार्यक्रम ल्याइएको बताए।

यो नीति अन्तर्गत बागलुङ नगरपालिका भित्रका बाँझो र खाली जमिनमा फलफूल, कफी, टिमुर वा बहुमूल्य जडीबुटीका बिरुवा रोपी संरक्षण गर्ने किसानलाई प्रोत्साहनस्वरूप प्रतिजीवित बोट बराबर पहिलो वर्ष एक सय रुपैयाँ सिधै अनुदान दिइने उनले बताए। यो कार्यक्रम अन्तर्गत पहिलो वर्ष एक सय रुपैयाँ, दोस्रो वर्ष बोट जोगाउन सफल भएमा ७५ रुपैयाँ, तेस्रो वर्ष ५० रुपैयाँ र चौथो वर्ष २५ रुपैयाँ सिधै अनुदान उपलब्ध गराइने नीति नगरपालिकाको छ।