सीको उत्तर कोरिया भ्रमण : ताइवान मुद्दामा पाए किमको समर्थन

चिनियाँ राष्ट्रपति सी जिनपिङ उत्तर कोरियाको भ्रमण सकेर मंगलबार स्वदेश फर्किएका छन्। सात वर्षमा पहिलो पटक सोमबार राजधानी प्योङयाङ पुगेका सीले उत्तर कोरियाली नेता किम जोङ उनसँग द्विपक्षीय वार्ता गर्दै दुई देशबिचको परम्परागत गठबन्धन र मित्रतालाई ब्युँताउने संयुक्त प्रयासमा जोड दिएका थिए।

शिखर सम्मेलनका क्रममा सीले व्यापार, कृषि, निर्माण र प्रविधि जस्ता क्षेत्रमा सहयोग विस्तार गर्ने इच्छा व्यक्त गरे। उत्तर कोरियाली नेता किमले दुई देशको मित्रतालाई 'सबैभन्दा महत्त्वपूर्ण प्राथमिकता रणनीतिक कार्य' का रूपमा अगाडि बढाउने बताए। साथै, किमले ताइवान जलडमरूको दुवै किनारा एउटै देशको हो भन्ने बेइजिङको 'एक-चीन सिद्धान्त' प्रति आफ्नो पूर्ण समर्थन रहेको पुन: पुष्टि गरे।