नयाँ राजनीतिको दाबी र रास्वपाको अग्निपरीक्षा

राष्ट्रिय स्वतन्त्र पार्टी (रास्वपा) पुराना राजनीतिक दलप्रतिको वितृष्णा, भ्रष्टाचारप्रतिको आक्रोश र शासनप्रतिको निराशाबाट जन्मिएको राजनीतिक विकल्प हो । सुशासन, पारदर्शिता, जवाफदेहिता र नयाँ राजनीतिक संस्कारको बाचा गर्दै ठूलो जनमतसहित सत्तामा पुगेको रास्वपाका लागि अहिले सबैभन्दा ठूलो चुनौती विपक्षी होइन, आफ्नै जनप्रतिनिधिको बोली र व्यवहार बन्दै गएको देखिन्छ । पछिल्लो समय रास्वपाका केही मन्त्री तथा सांसदका विवादास्पद अभिव्यक्तिले पार्टीले दाबी गर्दै आएको ‘नयाँ राजनीति’को परिभाषामाथि नै प्रश्न उठाएको छ । भौतिक पूर्वाधार तथा यातायातमन्त्री सुनील लम्सालले काम नगर्ने ठेकेदारलाई ‘खुट्टा भाँचेर भए पनि काम लगाउन’ निर्देशन दिएको अभिव्यक्ति होस् वा प्रदेशमन्त्रीलाई थुन्ने र मेयरलाई कारबाही गर्ने चेतावनी, यी अभिव्यक्तिले कानुनी शासनभन्दा आवेगपूर्ण शक्ति प्रदर्शनलाई प्राथमिकता दिएको सन्देश दिएको छ ।

त्यस्तै कैलाली–२ का सांसद केपी खनालले नागरिकका प्रश्नको जवाफ दिने क्रममा ‘जाक्छु, समाएर थाहा हुन्छ’ भन्ने शैलीमा दिएको अभिव्यक्ति पनि जनप्रतिनिधि र नागरिकबीचको सम्बन्ध कस्तो हुनुपर्छ भन्ने गम्भीर प्रश्न हो । नागरिकले गुनासो वा प्रश्न राख्दा जनप्रतिनिधिले सुन्ने, बुझ्ने र समाधान खोज्ने हो; थर्काउने होइन । सांसद खगेन्द्र सुनारका विभिन्न विवादास्पद अभिव्यक्तिले पनि रास्वपाभित्र सार्वजनिक पदको मर्यादा र राजनीतिक भाषाशैलीबारे बहस जन्माएको छ । प्रहरी नेतृत्वमाथि प्रश्न उठाउनु सांसदको अधिकार हो । तर प्रश्न गर्ने अधिकारसँगै भाषाको मर्यादा र संस्थागत सम्मानको जिम्मेवारी पनि जोडिएको हुन्छ । त्यसै गरी टीका संग्रौला ‘ज्वाला’, राजु पाण्डेलगायतका सांसदका अभिव्यक्ति र गतिविधिले समेत पार्टीभित्र जनप्रतिनिधिको आचरण र अनुशासनबारे प्रश्न उठाएका छन् ।