सत्ता र शंकाले ध्वस्त नेपाली कम्युनिस्ट आन्दोलन

नेपालको कम्युनिस्ट आन्दोलन सात दशकभन्दा लामो राजनीतिक यात्राबाट गुज्रिएको छ । २००६ सालमा पुष्पलाल श्रेष्ठको नेतृत्वमा नेपाल कम्युनिस्ट पार्टी स्थापना भएदेखि २०१५ सालको पहिलो आमनिर्वाचन, पञ्चायतविरुद्धको संघर्ष, २०४६ सालको जनआन्दोलन, २०५२–२०६२ को माओवादी सशस्त्र विद्रोह र २०६२–२०६३ को ऐतिहासिक जनआन्दोलन हुँदै संघीय लोकतान्त्रिक गणतन्त्र स्थापनासम्म कम्युनिस्ट शक्तिहरूले नेपाली राजनीतिमा निर्णायक भूमिका निर्वाह गरेका छन् । तर २०८२ सालको प्रतिनिधिसभा निर्वाचन परिणामले यही ऐतिहासिक आन्दोलनको वर्तमान अवस्थामाथि गम्भीर प्रश्न खडा गरेको छ ।

निर्वाचन आयोगका अनुसार नेकपा एमालेले प्रत्यक्षतर्फ ९ सिट र समानुपातिकतर्फ १४ लाख ५५ हजार ८८५ मत प्राप्त गरेको छ। २५ वटा वामपन्थी घटक मिलेर बनेको नेपाली कम्युनिस्ट पार्टीले प्रत्यक्षतर्फ ८ सिट र समानुपातिकतर्फ ८ लाख ११ हजार ५७७ मत पाएको छ । केही वर्षअघि मात्र स्थापित राष्ट्रिय स्वतन्त्र पार्टीले प्रत्यक्षतर्फ १२५ सिट र समानुपातिकतर्फ ५१ लाख ८३ हजार ४९३ मत प्राप्त गरेको छ । समानुपातिकतर्फ रास्वपाले ५७, नेपाली कांग्रेसले २०, एमालेले १६ र नेपाली कम्युनिस्ट पार्टीले ९ सिट पाएका छन् ।