५ सयभन्दा बढी आप्रवासी बालबालिकालाई अमेरिकाबाट निकाल्दै छन् ट्रम्प

वाशिङटन डीसी । अमेरिकी राष्ट्रपति डोनाल्ड ट्रम्प प्रशासनले अमेरिकी सरकारी संरक्षणमा रहेका ५ सयभन्दा बढी अभिभावकविहीन आप्रवासी बालबालिकालाई देशनिकाला गर्ने तयारी गरेको आरोप लागेको छ । डेमोक्रेटिक पार्टीका सिनेटर रन वाइडेनका अनुसार प्रशासनले अमेरिकाको दक्षिणी सीमाबाट एक्लै प्रवेश गरेका र हाल सरकारी संरक्षणमा रहेका ५०० भन्दा बढी बालबालिकालाई निष्कासनका लागि पहिचान गरेको छ ।

यसअघि पनि ट्रम्प प्रशासनले अमेरिकामा अभिभावक नभएका ग्वाटेमालाका बालबालिकालाई स्वदेश फर्काउने प्रयास गरेको थियो । तर उक्त कदमलाई सङ्घीय अदालतले रोकिदिएको थियो । वाइडेनका अनुसार अहिले फेरि त्यस्तै प्रक्रिया अघि बढाइएको छ । यसपटक कम्तीमा छ महिनादेखि सरकारी संरक्षणमा रहेका र अमेरिकामा आफन्त वा कानुनी अभिभावक नभएका बालबालिकालाई लक्षित गरिएको छ ।