भेनेजुएली अधिकारी अलेक्स साब अमेरिका डिपोर्ट

कारकास । भेनेजुएलाका पूर्व राष्ट्रपति निकोलस मदुरोका निकट सहयोगी अलेक्स साबलाई अमेरिकामा निर्वासित गरिएको छ । भेनेजुएलाको आप्रवासन निकाय एसएआईएमईले शनिबार यसको पुष्टि गरेको हो । कोलम्बियामा जन्मिएका ५४ वर्षीय साबलाई गत फेब्रुअरीमा कराकासमा अमेरिकी र भेनेजुएली अधिकारीहरूको संयुक्त कारबाहीमा पक्राउ गरिएको थियो ।

उनको गिरफ्तारी पूर्व राष्ट्रपति मादुरोलाई अमेरिकी विशेष बलले पक्राउ गरेको एक महिनापछि भएको थियो । विश्लेषकहरूका अनुसार यसले कार्यवाहक राष्ट्रपति डेल्सी रोद्रिगेजको नेतृत्वमा अमेरिकी र भेनेजुएली सुरक्षा निकायबीच नयाँ स्तरको सहकार्य देखाएको छ । साब यसअघि सन् २०२० मा केप भद्रेमा पक्राउ परेका थिए र पछि अमेरिकामा घुससम्बन्धी आरोपमा हिरासतमा राखिएका थिए । उनलाई सन् २०२३ मा भेनेजुएलामा थुनिएका अमेरिकी नागरिकहरूको रिहाइको बदलामा क्षमादान दिइएको थियो ।