शिक्षाबाट रोजगारीतर्फ : नेपालका युवालाई उद्यमशील बनाउन विश्व बैंकको जोड

काठमाडौं । नेपालमा हरेक वर्ष करिब ५ लाख युवा श्रम बजारमा प्रवेश गरिरहेका बेला उच्च शिक्षालाई रोजगारी र उद्यमशीलतासँग जोड्नुपर्ने आवश्यकता बढेको विश्व बैंकले जनाएको छ। बैंकका अनुसार शिक्षा क्षेत्रमा पहुँच विस्तार भए पनि श्रम बजारले माग गर्ने प्राविधिक तथा व्यावहारिक सीप उपलब्ध गराउन नसक्दा युवाको रोजगारी र उद्यमशीलतामा चुनौती कायमै छ।

विश्व बैंकले सार्वजनिक गरेको अध्ययनअनुसार सन् २००१ मा ४९ प्रतिशत रहेको नेपालको साक्षरता दर सन् २०२१ मा ७६.२ प्रतिशत पुगेको छ। उच्च शिक्षाको विस्तार पनि तीव्र भएको छ। सन् २०२५ सम्म नेपालमा १ हजार ४ सयभन्दा बढी उच्च शिक्षाका संस्था र करिब ६ लाख ३३ हजार विद्यार्थी रहेको बैंकले जनाएको छ।