जुम्ली स्याउको बजार खोज्दै सहकारी

जुम्लाका बगैंचामा यति बेला स्याउ टिप्ने चटारो छ। रातो हुँदै गएका स्याउका दाना टिपेर किसान कार्टुनमा सजाइरहेका छन्। कतै परिवारका सबै सदस्य बगैंचामा छन्, कतै मजदुर लगाएर स्याउ टिपिँदैछ। वर्षभरि बगैंचा कुरेका किसानका लागि यो आम्दानीको मुख्य समय हो।

तर, स्याउ पाक्नु जति खुसीको कुरा हो, त्यसलाई उचित मूल्यमा बेच्नु त्यति नै ठूलो चुनौती। उत्पादन बढेको छ। बगैंचा विस्तार भएका छन्। फल दिने बोटको संख्या बढेको छ। तर, बजारको आकार र पहुँच किसानको उत्पादनको गतिसँगै बढ्न सकेको छैन। यही कारण स्याउ पाक्ने सिजन सुरु हुनासाथ किसानमाथि अर्को दबाब थपिन्छ, छिटो बेच्नुपर्ने।