रोकिएन तस्करी : सर्वसाधारणलाई सास्ती, तस्करलाई मस्ती

रूपन्देही प्रहरीले गत शनिबार ओमसतियाको सानोबलापुरबाट २३ लाख ९ हजार रुपैयाँ बराबरका ३९ वटा आइफोन बरामद गरेको छ। लु ५३ प ३३९८ नम्बरको स्कुटरको डिक्कीमा ती आइफोन राखिएका थिए। इलाका प्रहरी कार्यालय बेलहियाको टोलीले भारतबाट भन्सार छलेर ल्याइएका आइफोन र स्कुटर बरामद गरेको हो। तर स्कुटरमा सवार दुई जना फरार भए। इलाका प्रहरी कार्यालय बेलहियाका प्रहरी निरीक्षक हरिराम डाँगीले शंकाको आधारमा उनीहरूको पछ्याउँदा आइफोन बरामद गरिएको बताए। “प्रहरीले पछ्याएको सुइँको पाएपछि उनीहरू स्कुटर छोडेर गाउँतिर भागे,” प्रहरी निरीक्षक डाँगीले भने।

त्यसको दुई दिनपछि सोमबार फेरि तस्करीका ३५ थान आइफोन रूपन्देहीको कोटहीमाई गाउँपालिकाबाट बरामद भए। इलाका प्रहरी कार्यालय मझगावाले भारतीय नम्बर प्लेटको मोटरसाइकलमा ल्याइँदै गरिएका २० लाख मूल्यका आइफोन बरामद गरेको हो। प्रहरीले यूपी ५६ डीएक्स ८८३८ नम्बरको भारतीय मोटरसाइकल र कोटहीमाई–२ का पवनकुमार मुराउलाई समेत पक्राउ गरी भन्सार पठाएको छ।