बालबालिकाको सुरक्षाका लागि न्युजिल्यान्डको कडा कदम, १६ वर्षमुनिलाई सामाजिक सञ्जाल निषेध

काठमाडौं । न्युजिल्यान्ड सरकारले १६ वर्षमुनिका बालबालिकालाई इन्स्टाग्राम, टिकटक, फेसबुक र स्न्यापच्याटलगायत सामाजिक सञ्जाल प्रयोग गर्न रोक लगाउने गरी कानुन अघि बढाएको छ । बालबालिकाको मानसिक स्वास्थ्य, निद्रा, पारिवारिक सम्बन्ध र अध्ययनमा सामाजिक सञ्जालको नकारात्मक प्रभाव बढ्दै गएको भन्दै सरकारले कडा उमेर सीमा प्रस्ताव गरेको हो ।

प्रधानमन्त्री क्रिस्टोफर लक्सनले बालबालिकामाथि सामाजिक सञ्जालको बढ्दो प्रभावलाई बेवास्ता गर्न नसकिने बताउनुभएको छ । उहाँका अनुसार १३ देखि १७ वर्ष उमेर समूहका करिब एक तिहाइ बालबालिकाले दैनिक कम्तीमा पाँच घण्टा सामाजिक सञ्जालमा बिताउने गरेका छन् । लामो समयको प्रयोगले उनीहरूलाई हानिकारक सामग्री, लत लाग्ने प्रविधि तथा मानसिक दबाबको जोखिममा पारिरहेको सरकारको दाबी छ ।