३२ वर्षपछि दोबेला प्रहरी चौकी आफ्नै भवनमा

खोटाङ । ३२ वर्षसम्म भाडाको घरमा गुजारा गर्दै आएको खोटाङको दिक्तेल रुपाकोट मझुवागढी नगरपालिका–७ स्थित दोबेला प्रहरी चौकीले अन्ततः आफ्नै कार्यालय भवन पाएको छ । वि.सं. २०५१ सालमा स्थापना भएदेखि नै वार्षिक १८ हजार रुपैयाँ भाडा तिरेर स्थानीयको घरमा सेवा प्रवाह गर्दै आएको उक्त चौकी भदौको पहिलो हप्तादेखि आफ्नै कार्यालय भवनबाट सञ्चालनमा आएको छ ।

कोशी प्रदेश सरकारको भौतिक पूर्वाधार विकास मन्त्रालय अन्तर्गतको भौतिक पूर्वाधार विकास कार्यालय खोटाङले उपलब्ध गराएको बजेटबाट उक्त भवन निर्माण गरिएको हो । मूल्यअभिवृद्धि करसहित ४० लाख ७८ हजार ३९० रुपैयाँ लागतमा घेराबारसहितको उक्त कार्यालय भवन बासु कन्ट्रक्सन एण्ड सप्लायर्सले निर्माण गरेको हो ।