२५ लाख धरौटी' विरुद्ध नेपाल शैक्षिक परामर्श संघ, नियमावली सच्याउन सरकारसँग माग

काठमाडौं । नेपाल शैक्षिक परामर्श संघ (NECA) ले शिक्षा, विज्ञान तथा प्रविधि मन्त्रालयले सार्वजनिक गरेको "शैक्षिक परामर्श, भाषा शिक्षण तथा तयारी कक्षा (सञ्चालन तथा व्यवस्थापन) नियमावली, २०८३" प्रति गम्भीर ध्यानाकर्षण भएको जनाएको छ । संघले नियमावलीका केही प्रावधानहरू अव्यावहारिक रहेको भन्दै तत्काल पुनर्विचार गर्न सरकारसँग आग्रह गरेको छ ।

संघले जारी गरेको प्रेस विज्ञप्तिमा नेपालको संविधानले प्रत्येक नागरिकलाई शिक्षा प्राप्त गर्ने मौलिक अधिकार सुनिश्चित गरेको उल्लेख गर्दै शैक्षिक परामर्श सेवा विद्यार्थी तथा अभिभावकलाई सही सूचना, मार्गदर्शन र परामर्श प्रदान गर्ने ज्ञानमा आधारित सेवा क्षेत्र भएको जनाएको छ । अत्यधिक आर्थिक तथा प्रशासनिक मापदण्डले यस क्षेत्रलाई सीमित गर्दा शिक्षा क्षेत्रमा पहुँच संकुचित हुने संघको भनाइ छ ।