बालेनविरुद्ध आक्रामक रक्षा बम: सरकारको 'गरिबमारा' नीतिले नेपालीको मृत्यु, दोष सुनितामाथि थोपर्ने प्रपञ्च!

काठमाडौंमा शरीरमा आगो लगाएका मुगुका गणेश नेपालीको उपचारका क्रममा निधन भएको घटनाप्रति जेनजी नेपाल फ्रन्टकी संयोजक रक्षा बमले कडा आक्रोश व्यक्त गरेकी छिन्।

सामाजिक सञ्जालमार्फत उनले गणेशले आत्मदाहको बाटो रोज्नुमा काठमाडौंका पूर्वमेयर र हालका प्रधानमन्त्री बालेन्द्र शाहको कार्यशैली जिम्मेवार रहेको आरोप लगाएकी छिन्। संयोजक बमले लेखेकी छिन्, ‘३५ वर्षको भारी पुरानालाई बोकाउने रास्वपा समर्थक र बालेनको फ्यानबोईहरूले, बालेनलाई ३ वर्षको भारी बोकाउन अब तयार हुनुपर्छ। आज गणेश आत्मदाह गर्नुपर्ने अवस्था आउनु बालेन काठमाडौंको मेयर हुँदा महानगर प्रहरीमा प्लान्ट गरिएको अमानवीय, असंवेदनशील र गुण्डागर्दी प्रवृत्ति नै हो। ’