३० रुपैयाँ किलोमा बन्दा बेच्न ४ सय रुपैयाँ खर्च

जुम्लाको पातारासी–५, माथिल्लो लोर्पा गाउँकी ४५ वर्षीया जालरुपा बुढा हरेक साता डोकोमा बन्दाकाउली बोकेर सदरमुकाम खलंगा झर्छिन्। आफ्नै खेतबारीमा उत्पादन गरेको तरकारी गाउँमै बिक्री नहुने भएपछि उनी डोकोमा तरकारी बोकेर बजार पुग्ने गर्छिन्। तरकारी बिक्रीबाट आएको आम्दानीले उनको परिवारको नुनतेलदेखि छोराछोरीको पढाइसम्मको खर्च धानिँदै आएको छ।

जालरुपाले चार वर्षदेखि बन्दाकाउली बिक्री गर्दै आएकी छन्। उनले प्रतिकेजी ३० रुपैयाँसम्ममा बन्दा बिक्री गर्छिन्। ‘त्यही पनि मूल्य भयो भने हो, नत्र २५ रुपैयाँ केजीमा बेच्नुपर्छ,’ उनले भनिन्।