सरकारसँग गीता गुरुङको प्रश्न : गरिबको बलि कहिलेसम्म?

नेपाली कांग्रेसकी सांसद गीता गुरुङले सुकुम्बासी व्यवस्थापन र मुगुका गणेश नेपालीको घटनालाई लिएर सरकारको कार्यशैलीमाथि कडा प्रश्न उठाएकी छन्। प्रतिनिधि सभाको शुक्रबारको बैठकमा बोल्दै उनले वैकल्पिक व्यवस्था नगरी सुकुम्बासी परिवारलाई विस्थापित गर्नु अमानवीय भएको बताइन्।

सांसद गुरुङले बागमती किनारबाट हटाइएका परिवारलाई होल्डिङ सेन्टरमा राखेर पर्याप्त पानी, खाना र आधारभूत सुविधा उपलब्ध नगराइएको आरोप लगाउँदै सरकार नागरिकप्रति संवेदनशील हुनुपर्ने बताइन्। उनले झरीको समयमा कुनै पूर्वतयारीबिना परिवारहरूलाई विस्थापित गरिएको भन्दै यसले मानवीय संकट सिर्जना गरेको उल्लेख गरिन्।