महिलालाई आत्मनिर्भर बनाउन ८५ बाख्रा उपहार

गलकोट (बागलुङ) । बागलुङ नगरपालिका-१३ ढाडा स्वावलम्बी महिला समूहमा आबद्ध गीता परियारले गतवर्षको जेठमा एउटा बाख्राको पाठा उपहारमा प्राप्त गरेकी छन् । त्यही बाख्राबाट जन्मेको पाठी समूहका सदस्य चन्द्री हरिजनले उपहारस्वरुप यो वर्ष परियारबाट पाइन् । सोही समूहका सात महिलाले यस वर्ष सात वटा बाख्राका पाठा उपहारस्वरुप पाएका छन् ।

बागलुङ नगरपालिकाले तीन वर्षयता सञ्चालनमा ल्याएको आत्मनिर्भर परियोजनाअन्तर्गत नगरका १० वडाका ८५ महिलालाई यसवर्ष बाख्राका पाठा र बीउ पुँजीका लागि बोका उपहारस्वरुप प्राप्त गरेको छ । ‘आत्मनिर्भर बागलुङ’ कार्यक्रमअन्तर्गत नगरपालिकाले हेफरको प्राविधिक सहयोगमा महिलालाई ८५ वटा बाख्राका पाठी र बोका वितरण गरेको हो ।